Ken jy hierdie skrywer, Mevrou?

Soos 'n skilpad

Soos ‘n skilpad

Verlede week woon ek ‘n sessie by die Kleinmond Boekfees by.

‘n Paneelbespreking : “Om ‘n boek te publiseer”.

Daar sit ek in die geselskap van bekendes en kundiges en dit voel my Kleinmond se see kom woel in my gemoed.

Want sien, ek loop met stories in my hart.  Al vir jare lank.  Dis erg persoonlik en tog (so vertel die geleerdes) ook universeel.  Daar is glo niks nuuts onder die son nie.

So luister ek na die mense wat al jare in die publikasiebedryf werk en wat hulle te vertelle het, krap my behoorlik om.  Die hoop is min. Publikasie is maar vir ‘n uitverkore minderheid bestem. Dit wil-wil my moed breek.

Ek bewonder hulle vuur en drif en die herhaalde klem op professionaliteit.  Daar is selfs van hulle wat ook die pad van die skrywer stap (of al gestap het).  Ek wonder heimlik of hulle paadjie soos myne voel. Dit klink tog so.

Theresa Papenfus se: “Die angs het ‘n wonderlike werking” klink en voel vir my so reg.  Ek moet voortdurend waak dat die angs my nie lamlê nie. Dit kan my so maklik verhoed om selfs te probeer.  Dit kan my vir dae muilband.

Genadiglik is dit nooit vir té lank nie.  Daar is iets in my wat moet – ten alle koste wil skryf.  Dit dryf my.  Ek is eenvoudig nie myself as ek nie skryf nie. Dis beter vir al wat leef en beef dat ek na hartelus kan tik.

Ek worstel met my gevoelens oor die gesprek.

Dan onthou ek die skilpad.

Op ‘n dag lees ek dat ‘n skilpad die simbool van ‘n skrywer is.  Dit maak vir my volkome sin.  As skrywer steek ek my kop uit.  Ek waag dit om iets te probeer verwoord en neer te pen –  vir die wêreld om te sien en lees. Kom daar positiewe terugvoer, is die vreugde groot.  Is die kommentaar minder vleiend, trek ek summier terug in my dop, waar ek mooi met myself moet praat voor ek dit weer huiwerig uitwaarts waag.

Ek lees graag oor ander skrywers en hulle prosesse. Onlangs verslind ek onder andere JK Rowling en Stephen King se top tien wenke vir sukses en sug van verligting.

Want sien, ek herken tog myself daarin!

Ek herken my gedurige stryd om te glo dat ek kwalifiseer om myself “ ‘n skrywer” te mag noem.

Al die aanmanings van die groot geeste oor wat skryf nou eintlik van ‘n mens verg, laat my glimlag, want ek kan vasbyt!  Ek kan torring en oorskryf en weer oorskryf.  Ek kan ook, deur die genade, terugstaan en met verwondering kyk hoe ander dit wat ek begin het, neem en daarmee toor. Ek kan my verlustig in die skeppende samewerking wat uiteindelik tot ‘n finale produk lei – een wat hopelik betower en verryk. Iets wat ek wil beweer die wêreld ‘n beter (of sal ons maar beskeie wees en sê “‘n veranderde plek”) maak.

Ken jy hierdie skrywer, Mevrou?

Ek skryf omdat ek nie anders kan nie.

Ek wil iets wondermooi skep wat ander raak en verander. Dis my geskenk aan die wêreld.

Dit maak my gelukkig.

Advertisements
This entry was posted in writing and tagged , . Bookmark the permalink.

4 Responses to Ken jy hierdie skrywer, Mevrou?

  1. Trisa Hugo says:

    Dit was so lekker om jou daar te leer ken! (Ek het Louis se gedig daar by my nuutste inskrywing geplak. Dis eintlik baie inspirerend, noudat ons weet wat dit verg.)

  2. Annorien Roos says:

    Ek geniet elke keer jou skrywe, Perdita. Dit kom so uit die hart. I love it.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s